dening Dul Sukur
(Wakil Ketua Bidang Teknologi, Komunikasi dan Informasi FKKS SD/MI Muhammadiyah Jawa Tengah)
Rasane uwis sesasi punjul ora krungu glowehane Nini Dakem. Mula, 26 Nopember 2021 wingi inyong maring Banyumas. Jebul Nini Dakem lagi sibuk-sibuke panen melon. Sing jarene melon golden aroma.
Gene melon duwe omah barang ya, ana payone, ana pagere, nanging ora thukul sakjroning lemah. Jarene kuwi sing diarani melon hidroponik, mergo ditandhur kanthi media banyu.
Nang kana uwis rame mbanget, ana Pak Pahri Ketua PP FGM, ana Pak Pamuji Raharjo ketua FKKS SD/MI Muhammadiyah Jawa Tengah, lan ketua FKKS SD/MI Muhammadiyah Kabupaten/Kota se- Jawa Tengah, pokoke ruame mbanget.
“Ni, melone didum gratis apa?”
“Ya didol lah”
“Pira?”
“Telung puluh ewu sekilo!”
“Njajal siji kene”
Barang uwis dijukutna melon sing bobote sekilo patang ons, ternyata, wujude melon cuilik.
“Nini, iki melon apa jeruk?”
“Lha weruhe rika apa?”
“Melon sak upil kok patang puluh loro ewu”
“Angger upile rika gedhene sak melon, tek bayar 11T”
“Hahaha...aja sewot bae lah Ni”
“Rika durung icip kok muni larang, cicip disit kana, angger ora enak ora usah bayar”
Barang uwis tek cicipi, rasane kok beda karo melon biasa. Melone Nini Dakem luwih gurih, luwih manis, sekang aromane bae, jan mingin-mingini pokoke.
“Bener kandane rika Ni, iki melone renyah mbanget. Manis pisan, pantes regane larang. Tapi ya, janjane ora pati larang ari rasane seenak ini. Inyong yo wani bayar satus ewu patang kilo”
“Patang kilo satus rong puluh ewu, Dul !” Nini Dakem ngegas karo nunyul endhasku.
